Udalsarea 2030 euskal udalerri jasangarrien sareak Klima eta Energiaren aldeko Alkateen Itunari buruzko online informazio-jardunaldi bat antolatu du irailaren 15ean. EUDEL Euskadiko Udalen Elkartearekin lankidetzan, EAEko udalerri guztiei, bereziki 5.000 biztanle baino gehiago dituztenei edo dagoeneko Klimaren eta Energiaren Tokiko Plana (KETP) garatzen ari direnei, zuzenduta egon da.

Klimaren eta Energiaren aldeko Alkateen Ituna tokiko eremutik ekintza klimatikoa eta energetikoa sustatzen duen Europako ekimen nagusia da.

Jardunaldiaren helburua zalantzak argitzea, esperientzia inspiratzaileak partekatzea eta Europako ekimen honi atxikitzea erraztea izan zen. Aukera paregabea izan da Itunaren onurak, Euskadin eskuragarri dauden laguntzak eta bat egiteko beharrezko urratsak ezagutzeko.

Klimaren eta Energiaren aldeko Alkateen Itunarekin bat egiteak aukera ematen die udalerriei tokiko ekintza klimatikoarekin konprometitutako hirien mundu mailako mugimendu handienarekin bat egiteko. Gaur egun, Europako 12.000 udalerrik baino gehiagok elkarri laguntzen diote Europar Batasunaren helburuak betetzeko, ezagutzak, esperientziak eta baliabideak trukatuz. Nazioarteko sare horrek ikusgarritasuna, aintzatespena eta laguntza teknikoa ematen die udalei etorkizun jasangarriago eta erresilienteago baterantz aurrera egiteko.

Euskadin, Energiaren Euskal Erakundeak (EEE) eta Ihobe sozietate publikoak euskarri-egitura gisa jarduten dute atxikitako udalerri eta erakundeentzat.

Biek laguntza teknikoa eta metodologikoa ematen dute, bai KETPak egiteko, bai klima-aldaketa arintzeko eta horretara egokitzeko ekintzak abian jartzeko.

Horrela, jardunaldiaren egitarauak Ihoberen eta EEEren aurkezpenak bildu ditu. Miguel Morcillo Alkateen Itunaren Espainiako Bulegoko arduradunak ere parte hartu du. Gainera, klima-ekintzan urrats garrantzitsuak eman dituzten udalerriak inspiratzeko kasuak azaldu dira, eta bertaratutakoen galderak eta zalantzak argitzeko gune bat egon da.

Gaur egun, Euskadin 26 udalerri daude atxikita eta ia ehunek badute KETPa garatuta edo klimaren eta energiaren arloko politika planifikatzeko prozesuan daude. Udalsarea 2030ek gida metodologiko bat argitaratu du KETPa egitea errazteko, Itunak eskatzen dituen baldintzak betez.

Jardunaldi osoa dagoeneko ikusgai dago.