Ekimena Arabako lurralde historikoko udalerri, mankomunitate, kuadrilla, tokiko garapen-agentziei, foru-aldundiei eta EAEko toki-administrazioaren esku dauden erakundeei dago zuzenduta, eta administrazioko lehen esperientzia profesionaleko programa horrek klima-aldaketaren eta energia-trantsizioaren arloko 30 teknikari kontratatzea erraztuko die.

Hautagaiek ingurumen-zientzietako, kimikako, fisikako, ingeniaritzako, geologiako, biologiako, ekonomiako edo erlazionatutako titulazioetako graduko edo masterreko titulazioa izan beharko dute, bai eta euskara-maila aurreratua ere (B2).

Programaren helburua tokiko administrazioei klima- eta energia-planak garatzen laguntzea da, haien beharrizan zehatzetara egokituta, beren jarduera-eremuetan ingurumen-jasangarritasuna hobetzeko, gazteen kontratazio finantzatuaren bidez. Bestalde, prestakuntza-programa horri esker, toki-administrazioan sartutako talentu gazteek energia-trantsizioari eta klima-aldaketari buruzko prestakuntza jasoko dute.

Toki-administrazioek programan parte hartzeko interesa adierazi behar dute, uztailaren 7a baino lehen Novia Salcedo Fundazioaren, EEEren edo Ihoberen webguneetan horretarako diseinatutako formularioa betez. Uztailaren 15era arte, EEEk eta Ihobek gai teknikoak, jarduketa-eremuak eta egin beharreko zereginak ebatziko dituzte. Uztailaren 15etik 31ra bitartean, erakunde interesdunek Lanbiden aurkeztu beharko dituzte memoriak, onartuak izan daitezen. Abuztuaren 1etik irailaren 30era bitartean argitaratuko dira eskaintzak Lanbiden, eta hautaketa-prozesuari ekingo zaio. Urriaren 1etik 10era bitartean hasiko dira lan-kontratua eta prestakuntza espezializatua. Tutoreentzako prestakuntza urriaren 24an hastea aurreikusten da.

Programa Suspertze, Eraldaketa eta Erresilientzia Planaren –NextGenerationEU– barruan finantzatuko da, eta praktika modalitateko lan- eta soldata-kostuak barne hartzen ditu, Gizarte Segurantzako kotizazioa barne. 4tik 1era bitarteko kotizazio-taldeentzako diru-laguntzaren gehieneko zenbatekoa 32.108.92 eurokoa izango da; eta banakako babes-ekipamenduena, berriz, urtean 553,60 eurokoa, 4.etik 1.era bitarteko kotizazio-taldeetatik kontratatutako pertsonentzat. Programaren oinarrien arabera, kontratuaren kostuak balio horiek gainditzen dituenean, erakunde kontratatzaileek finantzatu beharko dituzte gehiegizko kopuruak.

Toki-administrazioek adierazi beharko dute Alkatetzen Itunaren esparruan edo beste edozein eremutan udal mailako klima- eta energia-planik dagoen, erakundeak udal-eraikin eta -instalazioetan energia-jasangarritasuneko planik duen, udal-mugikortasuneko planik dagoen, kontratatutako gaztea udaleko zein taldetan edo arlotan sartuko den eta kontratazioaren helburuen zehaztapena.

Kontratatutako pertsonek eginkizun hauek izango dituzte: klima- eta energia-planak egiten laguntzea, Alkatetzen Itunaren (PACES) esparruan edo beste edozein testuingurutan, edo toki-administrazioek udal-eraikinetan eta argiteria publikoan energia-eraginkortasuna hobetzeko eta energia berriztagarriak bultzatzeko dituzten planak bultzatzea, Energia-jasangarritasunari buruzko 4/2019 Legearen esparruan; energia aurrezteko eta energia berriztagarriak hedatzeko neurriak bultzatzea; klima-aldaketara egokitzeko neurrien planteamenduan laguntzea; ezarritako neurrien jarraipena eta ebaluazioa egitea eta tokiko jasangarritasun-prozesuekin eta 2030 Agendarekin koordinatzea; finantzaketa-iturriak eta zerga-mekanismoak identifikatzea, eta laguntza-eskaerak izapidetzea; eta produktuak eta zerbitzuak erostean eta kontratatzean ingurumen-irizpideak sartzea bultzatzea.

Uztailaren 3an, astelehena, online bilera bat egin zen udalerriei deialdia EUDELen bidez aurkezteko.